ភ្នំពេញ ៖ ចាប់ផ្តើមវិញហើយការតាំងពិព័រណ៌ ពាណិជ្ជកម្ម កម្ពុជា-ថៃ ក្រោយពីខកខាន អស់រយៈពេល ប្រមាណ២ឆ្នាំ ដោយសារបញ្ហាវិបត្តនៃជំងឺកូវីដ១៩។ ការតាំងពិព័រណ៌ ពាណិជ្ជកម្ម កម្ពុជា-ថៃ នេះធ្វើឡើងនៅមជ្ឈមណ្ឌលពិព័រណ៌កោះពេជ្រ ចាប់ពីថ្ងៃទី១២ ខែមករា ដល់ថ្ងៃទី១៥ ខែមករា ឆ្នាំ២០២៣ ដែលសុទ្ធជាទំនិញ មានគុណភាពល្អៗ មកពីប្រទេសថៃ ផ្ទាល់តែម្តង។
ពិព័រណ៌ ពាណិជ្ជកម្ម កម្ពុជា-ថៃ មានជាច្រើនស្តង់ ដែលមានដាក់តាំង នូវផលិតផល របស់ប្រទេសថៃ ច្រើនមុខ ច្រើនប្រភេទ សម្រាប់បងប្អូនប្រជាពលរដ្ឋ កម្ពុជា ក្នុងការជ្រើសរើស មានទាំង សម្ភារៈប្រើប្រាស់ ចំណីអាហារ សម្លៀកបំពាក់ គ្រឿងសំអាង គ្រឿងថែរក្សា សម្រស់ ទាំងបុរសនិងនារី ដែលសុទ្ធសឹងជា ផលិតផល ប្រកបដោយគុណភាពខ្ពស់។
ក្រុមអាជីវករ ដែលបានមកចូលរួមក្នុងការតាំងពិព័រណ៌ ពាណិជ្ជកម្ម កម្ពុជា-ថៃ បានរៀបរាប់ថា ៖ ការតាំងពិព័រណ៌នេះ គឺជាឪកាសដ៏ល្អបំផុត ក្នុងការបង្ហាញនូវផលិតផល ល្អៗ ដល់អ្នកប្រើប្រាស់ និងការផ្លាស់ប្តូរ បទពិសោធន៍ ពោលគឺ កម្ពុជា និងថៃ មានទំនាក់ទំនងនិង មានកិច្ចសហប្រតិបត្តិការកាន់តែល្អប្រសើរឡើងថែមទៀត។
យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជាទំហំពាណិជ្ជកម្មទ្វេភាគីរវាងកម្ពុជា និងថៃសម្រេចបានទឹកប្រាក់ប្រមាណ ១ ១៧៤ លានដុល្លារនៅត្រីមាសទី ១ ឆ្នាំ ២០២២ នេះ ដោយកើនឡើងចំនួន ១៦ ភាគរយធៀបនឹងរយៈពេលដូចគ្នាកាលពីឆ្នាំមុន។
ប្រភេទទំនិញដែលកម្ពុជា បានលក់ទៅឲ្យប្រទេសថៃរួមមាន ផលិតផលកសិកម្ម វត្ថុធាតុដើម ត្បូងថ្មមានតម្លៃ និងវាយនភណ្ឌ ខណៈថៃលក់មកឱ្យវិញនូវផលិតផលសម្រេចដូចជា ត្រី សាច់ ម្ហូបអាហារ និងភេសជ្ជៈ ជីសរីរាង្គ ស៊ីម៉ង់ គ្រឿងសំអាង គ្រឿងតុបតែងផ្ទះ ឧបករណ៍អេឡិចត្រូនិក រថយន្ត និងគ្រឿងបន្លាស់ សម្ភារៈការិយាល័យ និងបរិក្ខាសំណង់ជាដើម៕
Discussion about this post