(ភ្នំពេញ)៖ បុរសម្នាក់ ត្រូវបានប្រពន្ធរបស់ខ្លួនកាប់សម្លាប់យ៉ាងអាណោចអាធម៌រហូតដល់ស្លាប់នៅក្នុងម៉ុង។ ហេតុការណ៍នេះបានកើតឡើងកាលពីវេលាម៉ោង ២និង៣០នាទីយប់រំលងអាធ្រាត ថ្ងៃទី០៨ ខែតុលា ឆ្នាំ២០២១ ដែលស្ថិតនៅចំណុចភូមិកោះក្របី១ សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។
យោងតាមរបាយការណ៍របស់សមត្ថកិច្ចបានបញ្ជាក់ថា បុរសរងគ្រោះខាងលើមានឈ្មោះ អាត់ សូត្រ អាយុ ៧១ឆ្នាំ មុខរបរ ជាអ្នកមេីលដីចំការអោយគេ ។ ចំណែកឯស្ត្រីសង្ស័យមានឈ្មោះ ណាត នី អាយុ ៤៣ឆ្នាំ ជាប្រពន្ធរបស់ជនរងគ្រោះ ចប្ចុប្បន្ន អ្នកទាំង ២នាក់ ស្នាក់នៅភូមិកោះក្របី១ សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ។
យោងតាមប្រភពព័ត៌មានពីកន្លែងកើតហេតុ បានប្រាប់ឲ្យដឹងថា មុនពេលកើតហេតុ ក្មេងប្រុសម្នាក់ដែលជាអ្នករាយមងបង់សំណាញ់ត្រី បានប្រទះឃើញបុរសខាងលើដេកស្លាប់នៅក្នុងម៉ុង ភ្លាមៗនោះ ក្មេងប្រុសរូបនោះ បានរត់ទៅប្រាប់ប្រជាការពារភូមិ ឲ្យចុះមកពិនិត្យមេីលនៅទីតាំងខាងលេី ខណៈពេលនោះ ស្រាប់តែឃើញស្ត្រីខាងលើរៀបបម្រុងចេញពីទីតាំងកើតហេតុ ភ្លាមៗ ប្រជាការពារក៏ធ្វើការឃាត់ស្ត្រីរូបនោះ យកទៅសួរនាំនៅឯប៉ុស្តិ៍នគរបាលរដ្ឋបាលព្រែកថ្មី។
ក្រោយពីទទួលបានព័ត៌មាននេះ ភ្លាមកម្លាំងសមត្ថកិច្ចប៉ុស្ដិ៍ និងខណ្ឌ បានចុះមកដល់ទីតាំងកន្លែងកើតហេតុ ដើម្បីធ្វើការហ៊ុព័ទ្ធខ្សែនៅជុំវិញទីតាំង ដោយមិនអនុញ្ញាតឱ្យមានបងប្អូនប្រជាពលរដ្ឋណាម្នាក់ចូលមកក្នុងទីតាំងកន្លែងកើតហេតុឡើយ។ រួចមកកម្លាំងសមត្ថកិច្ចជំនាញបានធ្វើការរាយការណ៍ទៅកម្លាំងសមត្ថកិច្ចជំនាញផ្នែកកោសល្យវិច័យ ដើម្បីចុះមកធ្វើការត្រួតពិនិត្យទៅលើសាកសពរបស់បុរសរងគ្រោះខាងលើ។
ក្រោយមក កម្លាំងសមត្ថកិច្ចជំនាញ បានធ្វេីកោសល្យវិច័យរួចមក បានប្រាប់ឲ្យដឹងថា ជនរងគ្រោះខាងលើ ត្រូវបានជនសង្ស័យកាប់ជាច្រើនពូថៅ បណ្តាលឲ្យស្លាប់នៅនឹងកន្លែង។ ចំណែកឯស្ត្រីដែលជាប្រពន្ធរបស់ជនរងគ្រោះយកទៅកាន់អធិការដ្ឋាននគរបាលខណ្ឌច្បារអំពៅ ដើម្បីធ្វើការសាកសួរបន្តទៀត៕
Discussion about this post