ភ្នំពេញ៖ រយៈពេលពីរថ្ងៃហើយបន្ទាប់ពីកើតហេតុគ្រោះថ្នាក់ចរាចរណ៍ឡានបុកទ្រូងផ្លូវរបស់អ្នកនាង ដេត ម៉ាលីណា បង្កការចាប់អារម្មណ៍រហូតផ្ទុះរឿងអាស្រូវចោទនាងបង្កគ្រោះថ្នាក់ដោយសារមនុស្សប្រុស ចេញពីកន្លែងផឹកស៊ី។
ឡាញចេញទាំងយប់តែម្តង ថ្ងៃទី១៥ ខែតុលា ឆ្នាំ២០២១ អ្នកនាង ដេត ម៉ាលីណា បានចេញមុខបកស្រាយហើយដោយបានធ្វើការបដិសេធទាំំងស្រុងចំពោះ ការចុះផ្សាយនូវសារព័ត៌មានជាច្រើនដែលបានចោទប្រកាន់ថានាងមានសង្សារ និងជិះឡានដេញគ្នានោះទេ។ ពេលនេះនាងសូមអះអាងថា នាងមិនយកសង្សារ ឬ ស្រលាញ់បុរសណាឡើយ ដូច្នេះនាងធ្វើបដិសេធយ៉ាងដាច់ហឹងការ ចំពោះរឿងរ៉ាវនាងបើកឡានជួបគ្រោះថ្នាក់ដោយសារមនុស្សប្រុសនិងផឹកស៊ីនោះឡើយ។
អ្នកនាង ដេត ម៉ាលីណា ក៏បានបញ្ជាក់ថា បុរសម្នាក់រងការចោទប្រកាន់ថាសង្សារនិងសាហាយស្មន់នោះ គឺជាមិត្តភ័ក្ត្រនឹងនាងរយៈពេល១០ឆ្នាំមកហើយ ដែលរាប់អានស្គាល់ ហើយក៏មួយរយៈចុងក្រោយប្រហែល៣-៤ឆ្នាំ នាងមិនសូវបានជួបមុខគ្នាទេ ហើយថ្ងៃនោះ ជាថ្ងៃជួបកម្មវិធីញាំបាយជប់លៀងលក្ខណៈមិត្តភ័ក្ត្រ។ នាងនៅតែបន្តនិយាយយ៉ាងម៉ឺងម៉ាត់ថា នាងគ្មានទំនាក់ទំនងស្នេហានឹងបុរសខាងលើនេះទេ នាងនិងបុរសម្នាក់នេះគ្មានអ្វីលើសពីមិត្តភ័ក្ត្រ។
សូមបញ្ជាក់ថា ហេតុការណ៍នេះគឺរថយន្តស៊េរីទំនើបម៉ាក Rolls Royce មួយគ្រឿងនេះបានបើកបុកក្បាលទ្រូងផ្លូវនៅតាមបណ្ដោយផ្លូវសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ រាជធានីភ្នំពេញ ចំណុចទល់មុខអាគារប៊ូយុង បណ្តាលរងការខូចខាងផ្ទៃខាងមុខយ៉ាងដំណំ ហើយបាក់បង្កោលភ្លើងមួយដើម នាម៉ោង២ រំលងអាធ្រាត្រ ឈានចូលថ្ងៃ១៣ ខែតុលា ឆ្នាំ២០២១នេះ ។ រថយន្ត Rolls Royce នេះបានដកស្លាកលេខរថយន្តទុក មិនអោយក្រុមអ្នកសារព័ត៌មានថតឡើយ ។ ទោះបីជាយ៉ាងរថយន្តនៅតែត្រូវបានថតទុកដោយឃើញថា ស្លាកលេខដាក់ Mr. IDOL ដែលជារថយន្តរបស់អ្នកនាង ដេត ម៉ាលីណា ឬជាអតីតភរិយាលោក ឌួង ឆាយ។
បុរសម្នាក់ ដែលរងការចោទប្រកាន់ថាជាសង្សារឬសាហាយស្មន់នឹងអ្នកនាង ដេត ម៉ាលីណា នោះឈ្មោះថា “Samka Kit” ជាថៅកែភោជនីដ្ឋាន 1967 Muzik and Bistro ហើយអ្នកទាំងបានអះអាងជាមិត្តភ័ក្ត្រនឹងគ្នា។
សូមរំលឹកផងដែរថា ក្នុងវីឌីអូឡាយរបស់អ្នកនាង ដេត ម៉ាលីណា ថ្ងៃនេះផងដែរ មិនបានបកស្រាយលម្អិតនូវសាច់រឿងថ្ងៃកើតហេតុគ្រោះថ្នាក់ចរាចរណ៍នោះឡើយ ដោយនាងគ្រាន់និយាយម្តងប្រធានបទនេះ បន្តិច ប្រធានបទនោះបន្តិច ហើយចុងក្រោយអត្ថន័យនិងពាក្យបកស្រាយភាគច្រើនសុទ្ធនិយាយដៀមដាមឌឺរដងត្រឡប់ទៅវិញ ឬ ត្រឡប់សងទៅមនុស្សណាដែលនាងស្អប់៕
សូមស្តាប់ការបកស្រាយអ្នកនាង ដេត ម៉ាលីណា ក្នុងវិឌីអូ៖
Discussion about this post