ពិតជាចម្លែកមែន! បុរសម្នាក់ទល់លាមកក៏រកទៅពេទ្យ ស្រាប់តែមិនទាន់ដល់ផងក៏ដាច់ខ្យល់ស្លាប់តាមផ្លូវ

(បន្ទាយមានជ័យ)៖ បុរសម្នាក់ក្រោយបែកបាក់ជាមួយប្រពន្ធត្រូវទទួលចិញ្ចឹមកូន២នាក់ហើយមានជំងឺទល់លាមកក៏ហៅម៉ូតូឌុបទៅមន្ទីរពេទ្យស្រាប់តែដាច់ខ្សល់ស្លាប់តាមផ្លូវ។
ហេតុការណ៍នេះកើតឡើងនៅលើផ្លូវជាតិលេខ៥ ក្នុងភូមិបាលិលេយ្យ ក្រុងប៉ោយប៉ែតខេត្តបន្ទាយមានជ័យកាលពីរំលងអធ្រាត្រចូលថ្ងៃទី10 ខែវិច្ឆិកា ឆ្នាំ2021។

មន្ត្រីអាជ្ញាធរបានឱ្យដឹងថា បុរសដែលស្លាប់ឈ្មោះសិង្ហ ភ័ណ្ណារ៉ា អាយុ53ឆ្នាំ ជាកម្មករសំណង់ បានបន្សល់កូនប្រុសស្រី២នាក់ ។ កូនប្រុសច្បងឈ្មោះសិង្ហ ផាណាត់ អាយុ១២ឆ្នាំ និង កូនស្រីឈ្មោះសិង្ហ ធារី អាយុ9ឆ្នាំ ទាំង៣នាក់ឪពុកកូនស្នាក់នៅបន្ទប់ជួលក្នុងភូមិកើតហេតុ។

ពលរដ្ឋជិតខាងបានឱ្យដឹងថា ជនរងគ្រោះមានជំងឺទល់លាមករយៈពេល2ថ្ងៃមកហើយ ។ដោយមិនស្រួលខ្លួនក៏ហៅម៉ូតូឌុបឱ្យដឹកគាត់ទៅមន្ទីរពេទ្យស្រាប់តែដាច់ខ្យល់ស្លាប់តាមផ្លូវតែម្តង។ ពលរដ្ឋបន្តថា ជនរងគ្រោះបានបែកបាក់គ្នាជាមួយប្រពន្ធហើយ ត្រូវទទួលចិញ្ចឹមកូនទាំង2នាក់។

បន្ទាប់មកអាជ្ញាធរ សម្រេចយកសពទៅដម្កល់នៅ វត្តបាលិលេយ្យ ។ ចំណែកកូនប្រុសស្រី2នាក់ ត្រូវសមត្ថកិច្ចយកទៅសម្រាកនៅបន្ទប់ជួល ដើម្បីស្វែងរកសាច់ញាតិមកទទួល ៕