សមត្ថកិច្ចទម្លាយរឿងរ៉ាវពិតក្រោយម្ចាស់ហាង Mode Store ចូលខ្លួនបំភ្លឺនៅតុលាការ

ភ្នំពេញ៖ ពេលនេះ សមត្ថកិច្ចទម្លាយរឿងរ៉ាវពិតក្រោយម្ចាស់ហាង Mode Store ចូលខ្លួនបំភ្លឺនៅតុលាការហើយក្រោមចោទប្រកាន់លក់ផលិតផលក្លែងក្លាយទាំងអស់ហើយ ដែលលោកស្រី ខេង ពិទូពុធធីតា ម្ចាស់ហាង Mode Store ដែលមានទីតាំងស្ថិតនៅ ចំណុចផ្ទះលេខ14BC ផ្លូវលេខ៣៣៧ សង្កាត់បឹងកក់១ ខណ្ឌទួលគោក រាជធានីភ្នំពេញ កាលពីថ្ងៃទី២៦ ខែវិច្ឆិកា ឆ្នាំ២០២១ កន្លងទៅ បានចូលតុលាការបំភ្លឺចំពោះមុខលោក ចែ សុង ព្រះរាជអាជ្ញារងអមសាលាដំបូងរាជធានីភ្នំពេញ ជុំវិញករណី «នាំចូល រក្សាទុក លក់ទំនិញ ដែលមានម៉ាកក្លែងបន្លំនិងផលិតផលផ្សេងទៀត ថ្លែងម៉ាក ក្លែងប្រភព ក្លែងប័ណ្ឌធានានិងមិនសុចរិតនឹងទំនិញ» ។

ថ្ងៃទី២៩ ខែវិច្ឆិកា ឆ្នាំ២០២១ សមត្ថកិច្ចជំនាញបានឲ្យដឹងថា ក្រោយការចូលបំភ្លឺ គឺ តុលាការបានអនុញ្ញាតឲ្យថៅកែហាង Mode Store ត្រឡប់ទៅផ្ទះវិញ ហើយតុលាការនឹងបន្តនីតិវិធីជាបន្តបន្ទាប់ទៀត ។

ទន្ទឹមនេះ ដំណើររឿងពិតប្រាកដត្រូវបានលាតត្រដាងផងដែរ តាមរយៈរបាយការណ៍សុំរបស់សមត្ថកិច្ចដែលបានធ្វើឡើងគោរពជូនព្រះរាជអាជ្ញានៃអយ្យការអមសាលាដំបូងរាជធានីភ្នំពេញ ។

យោងតាមរបាយការណ៍ ចុះថ្ងៃទី១១ ខែវិច្ឆិកា ឆ្នាំ២០២១ របស់គណៈកម្មាធិការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់មានហានិភ័យខ្ពស់ដល់សុខភាពនិងសុវត្ថិភាពសង្គម ក្រសួងមហាផ្ទៃ បានរៀបរាប់អំពីអង្គហេតុយ៉ាងលម្អិតយ៉ាងដូច្នេះថា ៖

កាលពីថ្ងៃទី២៤ ខែមិថុនា ឆ្នាំ២០២១ សមត្ថកិច្ច បានទទួលបណ្ដឹងពីប្រជាពលរដ្ឋ ដោយបានរៀបរាប់ នូវភាពមិនប្រក្រតីអំពីការលក់ផលិតផលជាច្រើន នៅហាង Mode Store ដោយបានសំណូមពរឱ្យសមត្ថកិច្ច បើកការស៊ើបអង្កេតនិងបង្ក្រាប តាមនីតិវិធីឲ្យបានលឿននិងមានប្រសិទ្ធភាព ។

ក្រោយមក នៅថ្ងៃទី៣ ខែវិច្ឆិកា ឆ្នាំ២០២១ វេលាម៉ោង៩៖២៥នាទីព្រឹក តបតាមបញ្ជាដោយលោក ចែ សុង ព្រះរាជអាជ្ញារងអមសាលាដំបូងរាជធានីភ្នំពេញនិងសមត្ថកិច្ច នៃគណៈកម្មាធិការប្រយុទ្ធប្រឆាំងផលិតផលក្លែងក្លាយបានចុះពិនិត្យជាក់ស្ដែង ដល់ទីតាំងហាង Mode Store តែម្ដង ។ នៅក្នុងការត្រួតពិនិត្យនោះ សមត្ថកិច្ចរកឃើញផលិតផលជាច្រើន ។

ក្រោយពីត្រួតពិនិត្យរួចមក លោកព្រះរាជអាជ្ញារង ចែ សុង បានសម្រេចឲ្យដកហូតទឹកអប់១មុខ២ឯកត្តា ។ ដោយឡែកផលិតផលក្រៅពីនេះគឺតម្រូវឲ្យបិទឃ្លុំបេជាបណ្ដោះអាសន្ននិងតម្រូវឲ្យម្ចាស់ទីតាំងខាងលើជាអ្នកមើលថែរក្សាមិនឲ្យខូចខាតឬបាត់បង់ឡើយ និងតម្រូវឲ្យយកឈ្មោះ ខេង ពិទូពុធធីតា និង ឈ្មោះ ហ្សារ៉ន អុលវី ភេទប្រុស ជាម្ចាស់ទីតាំង ចូលខ្លួនទៅបំភ្លឺនៅចំពោះមុខសមត្ថកិច្ចគណៈកម្មាធិការប្រយុទ្ធប្រឆាំងផលិតផលក្លែងក្លាយដើម្បីបន្តនីតិវិធីផ្ដល់ចម្លើយពាក់ព័ន្ធនឹងប្រភពនាំចូលស្តុកទុក ដែលបានលក់បន្តនៅទំនិញដែលក្លែងម៉ាកសញ្ញានិងមិនសុចរិតនឹងទំនិញ ។

យោងតាមលទ្ធផលស្រាវជ្រាវនិងសួរចម្លើយ បានបង្ហាញថា នៅថ្ងៃទី៣ ខែវិច្ឆិកា ឆ្នាំ២០២១ លោកស្រី ខេង ពិទូពុធធីតា បានឆ្លើយប្រាប់សមត្ថកិច្ចថា ខ្លួនជាអាជីវករលក់ផលិតផលតាមអនឡាញនិងជាម្ចាស់ហាង Mode Store ។ ខ្លួនបានបើកហាង ចាប់តាំងពីឆ្នាំ២០១៨ រហូតមកដល់បច្ចុប្បន្ន ហើយលទ្ធផលដែលខ្លួនលក់នោះមានដូចជាផលិតផលនាឡិកា កាបូប វ៉ែនតា សម្លៀកបំពាក់ និង ផលិតផលគ្រឿងសម្អាងដែលផលិតផលទាំងនោះខ្លួនបាននាំចូលមកពីបរទេស មានដូចជា បារាំង អាមេរិក អង់គ្លេស អូស្ត្រាលី អាល្លឺម៉ង់ អ៊ីតាលី ហើយខ្លួនមានវិក្កយបត្រពីហាងនិងមានវិក្កយបត្រពីក្រុមហ៊ុននៃក្រុមហ៊ុនបរទេសទាំងនោះ ។

ចំពោះផលិតផលដែលខ្លួនបានដាក់លក់នៅក្នុងហាងទាំងមូល គឺបានសុំការអនុញ្ញាតលោកពីក្រសួងសុខាភិបាលបានតែចំនួន២មុខប៉ុណ្ណោះ គឺ ផលិតផលម៉ាក Mosbeau និងផលិតផលម៉ាក Loreal ។ ចំណែកលទ្ធផលក្រៅពីនេះ គឺ ខ្លួនមិនបានសុំច្បាប់នោះទេ ។

ផលិតផល នាឡិកា កាបូប វ៉ែនតា សម្លៀកបំពាក់និងផលិតផលគ្រឿងសម្អាង ខ្លួនបានទិញចូលចាប់ពីតម្លៃពី៥ដុល្លារអាមេរិកដល់តម្លៃ៦ពាន់ដុល្លារអាមេរិក ហើយលក់ចេញចាប់ពីតម្លៃ១០ដុល្លារទៅ៦ពាន់ដុល្លារទៅតាមប្រភេទនីមួយៗនៃទំនិញ និងលក់ផលិតផលទាំងនេះទៅឲ្យអតិថិជនតាមបណ្ដាខេត្តរាជធានីភ្នំពេញ ដែលតាមបណ្ដាខេត្តខ្លួនបានផ្ញើផលិតផលតាមរយៈក្រុមហ៊ុនដឹកជញ្ជូន វីរៈ ប៊ុនថាំ និងក្រុមហ៊ុន J&T ហើយរកការទូទាត់ប្រាក់ពីអតិថិជនគឺតាមរយៈលុយសុទ្ធ តាមធនាគារ ABA និង តាមវីង ។

លោកស្រី ខេង ពិទូពុធធីតា បានរៀបរាប់ប្រាប់សមត្ថកិច្ចទៀតថា ផលិតផលដែលខ្លួនបានដាក់នៅក្នុងហាងទាំងអស់នោះខ្លួនមិនបានឆ្លងកាត់ការត្រួតពិនិត្យពីស្ថាប័នពាក់ព័ន្ធណាមួយឡើយគឺខ្លួនបានសុំការអនុញ្ញាតពីស្ថាប័នក្រសួងពាណិជ្ជកម្មតែមួយ និងបានចាប់ផ្តើមបង់ពន្ធប៉ាតង់តាំងពីឆ្នាំ២០១៨មកដល់បច្ចុប្បន្ន ។

ចំពោះការផ្សព្វផ្សាយខ្លួនបានធ្វើការផ្សព្វផ្សាយតាមរយៈផេកហ្វេសប៊ុករបស់ហាងផ្ទាល់គឺឈ្មោះ Mode Store ហើយបានសុំច្បាប់ផ្សព្វផ្សាយពីស្ថាប័នក្រសួងពាណិជ្ជកម្ម ។

យោងតាមការស្រាវជ្រាវនិងពិនិត្យឯកសារគតិយុត្តិផ្សេងៗរបស់សមត្ថកិច្ច បានបង្ហាញ ថា សហគ្រាសឈ្មោះ Mode Store គឺជាផ្សារលក់ទំនិញតាមប្រព័ន្ធអ៊ិនធឺណេតប៉ុណ្ណោះ ដោយមិនអាចចេញចូលនាំចេញ ផលបានឡើយ ។

ជាមួយគ្នានោះ សមត្ថកិច្ចបានធ្វើការសន្និដ្ឋានជម្រាបជូនព្រះរាជអាជ្ញាអមសាលាដំបូងរាជធានីភ្នំពេញ ថា យោងតាមពាក្យបណ្ដឹង តាមអង្គហេតុ ការស្រាវជ្រាវរបស់សមត្ថកិច្ចនិងចម្លើយរបស់ឈ្មោះ ខេង ពិទូពុធធីតានិងឈ្មោះ ហ្សារ៉ន អ៊ុលវី គឺ ការជាប់ពាក់ព័ន្ធនឹងករណីនាំចូលរក្សាទុក លក់ទំនិញ ដែលមានម៉ាកក្លែងបន្លំនិងលក់ផលិតផលផ្សេងទៀត ក្លែងម៉ាក ក្លែងប្រភព ក្លែងប័ណ្ណធានានិងមិនសុចរិតនឹងទំនិញដោយសមត្ថកិច្ចចាត់ទុកថាជាអំពើដូចខាងក្រោមនេះ ៖
-ក្លែងបន្លំពាណិជ្ជសញ្ញាឬពាណិជ្ជនាម
-នាំចូល លក់ ប្រកាសលក់ឬមានបំណងលក់ដោយចេតនានូវទំនិញដែលមានម៉ាកក្លែងបន្លំឬមានចេតនាផ្តល់សេវា
-ជាអំពើមិនសុចរិតទាក់ទងនឹងទំនិញសេវាឬការអះអាងដែលបំភាន់។
-អំពើដែលទាក់ទងនឹងការអនុវត្តមិនសុចរិតនឹងទំនិញ
-ការក្លែងបន្លំឬការប៉ុនប៉ងក្លែងបន្លំតាមមធ្យោបាយឬវិធីណាមួយក៏ដោយលើផលិតផលទំនិញនិងសេវាចំពោះអត្តសញ្ញាណប្រភពប្រភេទគុណភាពខាងរូបធាតុ ឬ ខាងទ្រទ្រង់រាងកាយធាតុផ្សំបរិមាណ
-មានចេតនាធ្វើឲ្យបាត់វត្ថុតាងព្រោះថាបច្ចុប្បន្ននេះឈ្មោះខេង ពិទូពុធធីតា នៅតែបន្តលក់ផលិតផលដែលខុសច្បាប់ទាំងនោះដដែលទាំងខ្លួនព្រមទទួលស្គាល់ថាផលិតផលរបស់ខ្លួនមិនមានច្បាប់អនុញ្ញាតនិងមិនទាន់មានសេចក្ដីសម្រេចណាមួយពីតុលាការអនុញ្ញាតឲ្យដំណើរការកម្មឡើងវិញ ។

ទោះបីយ៉ាងណា កាលពីពេលកន្លងទៅ លោកស្រី ខេង ពិទូពុធធីតា បានធ្វើការ Live តាមបណ្តាញសង្គមហ្វេសប៊ុក ដោយបដិសេធថា ខ្លួនជាអាជីវករត្រឹមត្រូវនិងលក់ផលិតផលត្រឹមត្រូវស្របច្បាប់ជូនអតិថិជន ។
ទន្ទឹមនេះ យោងតាមប្រភពព័ត៌មានដាច់ដោយឡែកផ្សេងទៀតបានឲ្យដឹងថា មានម្ចាស់ក្រុមហ៊ុនមួយចំនួនក៏បានប្ដឹង លោកស្រី ខេង ពិទូពុធធីតា ម្ចាស់ហាង Mode Store ទៅសមត្ថកិច្ចផងដែរ ដែលពេលនេះសមត្ថកិច្ចកំពុងចាត់ការបន្តតាមនីតិវិធី ៕

របាយការណ៍ សមត្ថកិច្ច