ថ្វីបើប្រើដុំធ្យូងអនាម័យក៏ដោយ ក៏ខ្យល់ពុលគ្របដណ្ដប់លើទីក្រុងអ៊ូឡង់បាតារ

អ៊ូឡង់បាតារ/ម៉ុងហ្គោលី – សម្រាប់រយៈពេលបីឆ្នាំចុងក្រោយនេះ ផ្សែង និងការបំពុលខ្យល់គឺជាបញ្ហាមួយក្នុងចំណោមបញ្ហាសំខាន់បំផុតនៅក្នុងរដ្ឋធានី អ៊ូឡង់បាតារ របស់ប្រទេសម៉ុងហ្គោលី។

ការប្រើប្រាស់ធ្យូងអនាម័យដែលបានកែលម្អបានកាត់បន្ថយការបំភាយឧស្ម័នបន្តិចបន្តួចបើប្រៀបធៀបទៅនឹងឆ្នាំដែលធ្យូងថ្មឆៅត្រូវបានប្រើប្រាស់ជាទូទៅ។ ទោះយ៉ាងណាក៏ដោយ ការបំភាយផ្សែងពណ៌សមានជាតិពុលច្រើនជាងមុន។

ប្រធានទីភ្នាក់ងារគ្រប់គ្រងការបំពុលខ្យល់នៅអ៊ូឡង់បាតារ លោក B.Purevsuren បាននិយាយថា ចំនួនប្រភពបំពុលខ្យល់នៅក្នុងទីក្រុង អ៊ូឡង់បាតារ ដូចជារថយន្ត និងតាមគ្រួសារត្រូវបានកើនឡើងជាលំដាប់ចាប់តាំងពីការប្រើប្រាស់ដុំធ្យូងអនាម័យបានចាប់ផ្តើមនៅឆ្នាំ 2019។

នៅក្នុងខែវិច្ឆិកាឆ្នាំមុន ចំនួនយានយន្តបានកើនឡើង 16 ភាគរយបើធៀបនឹងខែដូចគ្នាក្នុងឆ្នាំ 2019 ប្រសិនបើគិតទៅ 70 ភាគរយនៃរថយន្តទាំងនោះមានម៉ាស៊ីនម៉ាស៊ូត និងសាំង។
ប្រជាពលរដ្ឋបាននិយាយថា ការឆេះដុំធ្យូងបានបណ្ដាលឱ្យមានផ្សែងពុល បណ្ដាលឱ្យបំពង់ផ្សែងមានក្លិនស្អុយ។

យោងតាមក្រុមគ្រួសារជាច្រើនបានឱ្យដឹងថា ផ្សែងពណ៌សដែលបញ្ចេញចេញពីការដុតដុំធ្យូងអនាម័យអាចបណ្តាលឱ្យឈឺបំពង់ក។ ទន្ទឹមនឹងនេះ លោក Purevsuren បានសំដៅលើមធ្យោបាយដុតដុំធ្យូងអនាម័យមិនត្រឹមត្រូវរបស់ប្រជាពលរដ្ឋ ដោយនិយាយថា ការដុតមិនតាមស្តង់ដារគឺជារឿងធម្មតា និងរួមចំណែកដល់ការបង្កើនការបំពុលបរិយាកាស។