ប្រជាជនកម្ពុជាប្រារព្ធពិធីប្រពៃណីដើម្បីទទួលបាននូវរាសីល្អ និងសុខភាពល្អ

ជំនឿពីអតីតកាលនៅតែមានឥទ្ធិពលក្នុងជីវិតរស់នៅប្រចាំថ្ងៃសម្រាប់ប្រជាជនកម្ពុជា។ ការប្រារព្ធពិធីសាសនានៅតាមជនបទដូចជា ពិធីកាត់គ្រោះ លើរាសី គឺជាពិធីមួយដែលខ្មែរយើងតែងតែប្រារព្ធនៅពេលដែលមនុស្សម្នាក់យល់ថាខ្លួនកំពុងមានគ្រោះ។

ប្រជាជនតម្រូវឱ្យរកអាចារ្យធ្វើការទស្សទាយ បន្ទាប់មកនិមន្តព្រះសង្ឃធ្វើពិធីកាត់គ្រោះដើម្បីដេញភាពចង្រៃដែលមកយីយារូបគេ។ តាមរយៈពិធីតាមបែបសាសនាមួយនេះ បុគ្គលខ្លះមានជីវិតប្រសើរជាងមុន ហើយខ្លះទៀតក៏មិនមានភាពសមប្រកបផងដែរ។

លោកអាចារ្យ មួន សាម៉េត មានជំនឿថា ពិធីសូត្រមន្ត និងបន់ស្រន់នេះ អាចរក្សាអាយុជីវិត និងការពារមនុស្សម្នាក់នោះបានដោយករណី។ ចំណែកលោកអាចារ្យ មឿយ ម៉ៃ មានប្រសាសន៍ថា ការធ្វើពិធីមួយនេះមិនអាចជំនួសវិស័យសុខាភិបាលក្នុងការផ្តល់ការថែទាំចាំបាច់បាននោះទេ ដូច្នេះពិធីតាមប្រពៃណីគឺសម្រាប់តែការផ្តល់កម្លាំងចិត្តតែប៉ុណ្ណោះ។

ពិធីនេះក៏បានបង្ហាញពីការរួបរួមសាមគ្គីគ្នារវាងអ្នកជិតខាង និងម្ចាស់ផ្ទះដែលប្រារព្ធពិធីនោះ។ ដែលភាគច្រើន នៅតាមជនបទគឺនៅរក្សាប្រពៃណីចេះជួយយកអាសារគ្នាទៅវិញទៅមកច្រើនជាងអ្នកនៅទីក្រុង។